السبت، 18 أكتوبر 2008

(وصف جمهورية سفنكس)

الحمد لله ....حقيقي يا اخواني العلم نور...الواحد قاعد وبيكتب وبيعبر عن رايه بدون اية ضغوط انا مش مصدق نفسي.... ربنا يستر...المهم المدونه دي بتاعتي انا وبالتالي بعرض فيها رأيي انا مش رأي الشارع المصري يعني اللي يتفق معايا الله يباركله واللي يختلف معايا كمان الله يباركله مفيش مشكله المهم ان كل واحد يقول رايه بصراحه ...

طيب ايه بقى حكاية (جمهورية سفنكس) .......... الأول لازم نبقى عارفين ان سفنكس ده يعني ابوالهول وهو رمز السكوت والصمت .

جمهورية سفنكس يا احبائي هي جمهوريه عربيه ديمقراطيه تقع في: شمال قارة افريقيا. ويحدها : من جميع الجهات بحر الظلمات .... يا لطيف اللطف يارب.... العلم: حتة قماشه سودا عليها رمز الشعب ( تمثال ابو الهول)

عدد السكان:( العدد ف الليمون ) متعدش بالعبيط .الحرفه والصناعه الأساسيه:الصمت والسكوت وعدم التدخل في شئونهم هما مش ف شئون حد تاني يعني شعب بيحب الهص او بمعنى اخر الهش. وعشان نقول الحق مؤخرا في قله مش عارف منحرفه ولا عاديه ابتدت تتكلم وتتمرد على جنسيتها السفنكسيه وهو ما تناقلته جميع وسائل الاعلام في الأونه الأخيره.

يختص ويتميز المواطن السفنكسي بعدة خصائص اهمها :-

ــ لايمكن ان يعبر باي صوره من الصور عن رايه الا وهو على سريره اقتناعا بمبدأ دع الملك للمالك .

ــ دائما مستحضر لتاريخه العظيم في البطوله وان الدنيا فعل مش كلام ودلوقتي بقى لا في فعل ولا كلام.

ــ الحياة الخاصه هي أصل الحياة اما الحياة العامه فهو مصطلح هلامي غير مفهوم المعنى عند السفنكسيين.

ــ يتفق على انه من رأى منهم منكرا فليغيره بقلبه وهذا اقوى الأيمان واساسا مفيش خيارات تانيه .

ــ جميع افراد الشعب السفنكسي يحملو لقب واحد وهو (ابوالهول ) والكلام ده في العقل الباطن مش في العلن .

هذه هي اهم خصائص وصفات شعب السفنكسيين.وبنظرة عابره سريعه على التاريخ الحديث نجد ان لهذا الشعب اصل فقد ظهرت بشايرواوائل هذا الشعب حسب اقوال مؤرخين التاريخ الحديث في خمسينات القرن الماضي وكان يطلق عليهم في هذا الحين .... الشعب المصري.... وفي هذا الوقت كان السفنكسيين قله والكثره كانت للمصريين

ويذكر التاريخ اشياء عجيبه عن الشعب المصري الذي هو اصل الشعب السفنكسي فيقول التاريخ على الرغم من ان هذا الشعب كان محتلا الا انه كان دائما شعبا ثائرا يتطلع ويحاول ان يكون افضل ... وقال ايه كان بيسقط حكومه ويجيب حكومه تانيه وبينتخب ويقول رأيه ويدلي بصوته في كل حاجه.... يا سبحان الله...... طب ايه اللي حصل .... ياجماعه في ايه... فين المصريين دول بتوع زمان ...... الواضح بقى ان التاريخ لم يسجل او يدون وقائع حقيقية تم فيها استبدال الشعب المصري بالشعب السفنكسي .... انا مش فاهم التاريخ ده تبع مين...... بس اللي نسيه التاريخ ان في مصريين لسه عايشيين من هذه الحقبه شاهدت و شهدت على عمليات التحويل وما تبعها من فظائع واهوال وحقائق واشاعات ايضا وهؤلاء المصريين وان كانو قله رفضو ان يكونو سفنكسيين وعاشو كمصريين وخلفو عيال وربوهم كمصريين بس يعني هما قله ... بس قلة العدد دي هيه اللي تخلي في امل ..... والحمد لله على كل حال .

هناك تعليق واحد:

محمد فاروق الشاذلى يقول...

أول تعليق
أولا مبروك الشكل الجديد للمدونة
ثانيا الشعب المصرى اللى انت بتدور عليه ابتدى يعلن عن نفسه فى الفضاء التخيلى لعالم التدوين ومجموعات الفيس بوك ونتمنى جميعا ان تنتقل جينات المصريين الحقيقين إلى شعب سفنكس لنعود جميعا مصريين كما كنا